注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

逍遥斋的博客

记录,是一个生命对另一个生命的启示。

 
 
 

日志

 
 
关于我

日日年年,频更世象,得闲惟好翻书。史中悲喜,嗟叹复长吁。小白匆匆过隙,回头望、心梦空余。人生短,苦思取舍,终去向山湖。 孤途,行万里,荒郊大漠,野鹤悠如。又高域临风,心旷神舒。拜了先贤故迹,沧桑事、恍若须臾。堪求得,世间一切,于我不生疏。

网易考拉推荐

童年旧事·涨大水格辰光(上海话)  

2013-08-26 12:56:35|  分类: 岁月留痕 |  标签: |举报 |字号 订阅

  下载LOFTER 我的照片书  |
       小辰光住格地方,地势比较低,一落大雨,弄堂外头十字路口就会涨大水。一般格大雨也就四只转弯角子积眼水,马路当中还露了嗨,假使碰到落暴雨了,大水就会涨到一尺多深,马路就全部淹忒。迭个辰光朝四面看过去,东南西北四条马路几十米、一百米之内侪是水,一片汪洋。
       阿拉格弄堂比外头路口地势高一眼,排水还算好,一般性格大雨勿会积水,最多水龙头旁边一小块地方有眼水。假使落暴雨外头马路浪大水涨了结棍了,弄堂口侪是水了,格就呒没办法了,大水会冲进弄堂里,还会翻过每家人家格门槛,弄得来屋里厢侪是水。虽然讲阿拉会拿块汰衣裳板挡勒门口头,但是水又哪能挡得牢?屋里厢格水一直要涨到搭外头一样高才勿涨了。
       等到雨小下来了,我格阿爷就会戴一顶草帽,到弄堂当中水龙头旁边,弯下腰去搬开压勒泱沟洞(下水口)浪格大石头,好让水快点流下去。
       小辰光屋里厢进过几趟水已经记勿清爽了,只记得有一趟雨落勒特别大,屋里厢格水涨到快半尺深了,脚盆也浮起来了,还有几只小缸小甏,像吃饱了老酒一样,勒拉水里厢摇来摇去晃发晃发,立勿牢了。
       涨大水格日脚到底少,千日难板碰到一趟,阿拉小人侪想乘机出去白相。白相啥?就是白相大水呀。对小人来讲,啥么事新鲜,啥么事就好白相。大人是老急格,叫牢仔自家小人,快点弄清爽屋里厢格水最要紧。阿拉就拿面盆,拿搪瓷杯,一记一记朝外头舀水。外头水下去快,阿拉舀了也快,别过也弄了一个钟头快。随后拿拖奋拖,拿干布揩。到了格个收尾巴辰光阿拉就憋勿牢了,偷偷溜出门。弄堂里格水已经少了,呒没劲,就跑到弄堂外头,外头水下去慢,还是一片汪洋。阿拉穿了木拖板走进水里,格个叫啥?格个就叫“逛大水”。逛大水格小人勿少,侬叫伊,伊叫侬,喳喳呱呱,老开心格样子。还有脚踏车三轮车格铃声,闹猛几花。
       因为迭个路口是重要交通要道,南北东西来来往往必经之地,买菜格下班格大人是呒没办法必须穿过路口,伊拉侪是从上街沿贴勒墙壁走,上街沿水少,一歇歇就排起了一排人。到了路口呒没办法了,只好脱了鞋子卷起裤子到水里厢走咯几十步。有格人就沿牢上街沿转弯一直走,到呒没水格地方了再穿马路,要多走较关路。有格皮小人勿懂道理,勒拉水里厢奔起来,自家裤子弄湿忒勿讲,还弄得来水花乱溅,旁边人格衣裳也湿忒了,引得来大人格一片训斥声骂声,
       人勒拉水里厢走勿快,又是木拖板,只好一小步一小步移动。伊格辰光车子少,难得开过来一部,大家连忙跑到上街沿,因为车子开过会有勿小格波浪,朝两面一波一波冲过来,小人离了忒近,会有立勿牢格感觉。三轮车蛮多咯,到水深格地方半只轮盘侪淹勒水里厢了。记得伊格辰光就已经有摆渡了,从南到北穿过大水就一百多米,人家着了皮鞋穿了挺刮好衣裳,舍勿得嘛。
       涨大水格水老龌龊咯,砖头缝里墙角落里格垃圾纳污泥,侪一记头冲了出来,水是浑糟糟,墨赤黑。小人勿管咯,照样勒拉水里厢走来走去。后来大人讲水里厢有蚂蝗,格是蛮吓人咯,连忙逃上来。蚂蝗要吸人格血,格是晓得咯。
       涨大水格辰光还有一桩奇怪事体,就是蜻蜓老多咯,落大雨前头有,雨停了也有,贴了水面飞来飞去,一大群,上海人叫“大水蜻蜓”。我想蜻蜓是欢喜水咯,伊拉是要靠水来繁殖后代咯,勿是有蜻蜓点水格成语嘛,城市里河浜少,水面少,所以落大雨了涨大水了蜻蜓就开心了,飞来飞去寻朋友,做伊想做格事体。
       因为是平房,落大雨格辰光还碰到过倒霉事体,就是屋顶漏水。平常勿落雨勿晓得,屋顶瓦片实际浪厢老早就拨野猫跑来窜去动过了,一落大雨就漏了,滴滴嗒嗒,还勿止一搭地方,只好用面盆脚盆接了下头。第二天阿爹就会爬上屋顶去拿瓦片排排齐。我到了十几岁,也爬上屋顶去排过瓦片,人小,瓦片勿大会踏碎。
       现在我住格地方是勿会涨大水了,但是老市区里还是有地势低格地方,还是会涨大水,一到落暴雨,有格人家屋里厢还是会进水咯。总归是一份苦恼啊!
(2013.8.26.)
逍遥斋推荐阅读:
  评论这张
 
阅读(136)| 评论(87)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017