真是天晓得!污搞百叶结。原来气象台连搭两个钟头之内格天气还测不准。
今朝上网一看,本来预报后头几天全是36度37度,现在统统降低2度,变成34度35度了。吃教训了么,学乖了。
实在有点奇怪,为啥老天爷又开始发戆劲?为啥偏偏要让气象台出洋相?额骨头一拍,哦,想起来了。前个礼拜,勿是第九号台风梅花“梅超风”要来了嘛,电视里厢只看到气象台朋友格面孔,风头出足。伊拉是一本三正经,左算右算,预报讲上海会受到10级到11级狂风影响,弄得来大家是人心惶惶。结果只有7级风,雨也呒没落啥,完全就是个“梅干菜”嘛。侬想想看,介大桩事体,领导格眼睛,老百姓格眼睛,大家一道盯牢伊气象台,想想伊拉总归勿会拆烂污伐,肯定扑上全部精力了,结果,还是一眼眼也呒没讲准。看看人家美国日本,离了介远,提前两天就一讲一个准,阿拉近勒拉眼面前还讲勿准,坍招势啊!搞啥么事嘛!房价接轨了,物价接轨了,台型扎足,偏偏手里厢格本事呒没接轨。唉,还勿晓得啥辰光接得了轨啊。
本事呒没,歪门邪道格怪点子倒来得多,侬看,前两天气象局又推出了个啥格“鼻腔清洗指数”,还讲是“便民气象指数”。真叫大家哭笑勿得,挖塞啊!
气象局格兄弟爷叔,朋友帮帮忙好伐!少来眼花露水,少翻眼花样经,老老实实拿倷最基本格生活做做好好伐?侬勿相信问问大家看,保证99%格人根本勿会想到啥个汏鼻头孔。侬想想看,老百姓每天要起早摸黑扒分去,揩面孔也急出污拉,还要到小菜场讨价还价,还要上网看又有啥么事勿好吃了。吃牛奶要担心三聚氰胺,吃肉要担心瘦肉精,饭也吃勿太平啥地方还有心思去汏鼻头孔?真勿晓得气象局朋友几天汏一趟鼻头孔?哦,再仔细一看,“洗鼻指数”前头还有三个商品牌子格字,原来是帮人家推销产品啊,怪勿得介卖力,介大张旗鼓。
唉,写了半天,想写格字电脑里打勿出,好勿容易寻到字写出来了,勿晓得现在气象局里有几个是上海人?有几个人看得懂?(2011.8.17.)
注:“倷”字本想用单人旁加一个那字,伐字本想加个口字旁格,但是电脑打勿出,只好将就了,请大家谅解啊!
又:昨晚,在众多专家和广大百姓的质疑反对下,气象局宣布停止“洗鼻指数”的发布,才三天即草草收场,短命呵!(2011.8.18.)
评论